APRIL 2022
Datuk Amar Douglas Uggah Embas Ngabas Kompleks ICQS Tebedu
SERIAN: Sapit Premier Sarawak, Datuk Amar Douglas Uggah Embas udah ngabas bejalaika pengawa perintah ngagai Kompleks Kastam, Imigresen, Kuarantin enggau Pengelikun (ICQS) Tebedu ditu, kena Hari Tiga.
Maya pengawa nya, iya ke mega Chairman Komiti Penyangga Penusah Nengeri (JPBN) Sarawak madah, udah pintu penama entara menua Malaysia dibuka 1 April tu tadi, bisi 463 orang datai tama ke Sarawak nengah jalai darat lalu 1,074 iku agi pansut ari menua tu.
Ari penyampau nya, rayat Malaysia ke datai ari Indonesia pulai tama ba timpuh 1 April ngagai 12 April bisi 23 iku lalu sida ke pansut ari Sarawak bisi 21 iku.
Peranak Indonesia ke bisi permit gawa bisi 439 iku tama ke Sarawak lalu 1,053 iku pansut ari menua tu kelimpah siku peranak China tama nengah ICQS Tebedu.
Datuk Amar Douglas madah, enti menua Indonesia udah muka pintu penama entara menua ngagai sida ke bisi pas nemuai rama, urung 400 iku peranak Indonesia dipelabaka tama ke Sarawak ninting hari, enti dikira puku rata.
Maya nya mega, iya bisi mendingka penerang ari Pegawai Pengerai Sitak Serian, Dr Edmund bekaul enggau chara enggau Atur Operasyen Standard (SOP) peranak Indonesia tama nengah ICQS.
Pengawa sehari nya bela disempulang Menteri Pelajar, Inovasyen enggau Pemansang Pengelandik Sarawak, Datuk Roland Sagah Wee Inn, Sapit Menteri Betanam Betupi Moden enggau Pemansang Kandang Menua Sarawak (Pemansang Kandang Menua), Maclaine Ben@ Martin Ben, Kaban Kunsil Nengeri (ADUN) Tebedu, Dr. Simon Sinang@ Sinang Bada, Sapit Sekretari Perintah Nengeri (Transformasyen Menua Pesisir), Datu Ik Pahon Joyik enggau Residen Sitak Serian, Tuah Suni. -EDISI UKAS
Sumber dari : UKAS